السلام عليكم
كل يوم نسمع ان في المدرسة الفلانية حدث شجار بين المديرة و طالبة، أو طالبة و الاخصائية أو مدرسة و المديرة أو الوكيله..
هالاشياء نسمعها من بعض المدرسات أو الطالبات، بس ما نشوف ان الخبر انتشر في الجرايد أو الموضوع و صل للشرطة..
بس ليش هالموضوع بالذات انتشر في الجرايد ووصل الموضوع للشرطة و حولت القضية الى المحكمة...
الموضوع على حسب ما وصلني: طالبة في احدى المدارس المسائية في رأس الخيمة تشاجرت مع المديرة و الوكيلة حدث تبادل الشتائم و السب بينهم .
ما ابا ادخل في التفاصيل لان أدري البنت غلطانة لأنها سبت المديرة و الوكيلة لان كان لازم تحترمها و ما ترد عليها.وانا مب معترضة على هذا الشي..بس كان الموضوع ممكن ينحل بدون شكوى المديرة للشرطة وعدم تنازلها و تحويل القضية للمحكمة.. وتدرون شو حكمت عليها المحكمة؟؟ سجن لمدة شهر بسب شكوى المديرة و غرامة 3000 درهم للبنت و اختها و امها بسبب شكوى الوكيلة..!! مب حرااام مهما وصلت المواصيل بس ليش تدخل الطالبة السجن هي سبتها و ادري انها غلطانة بس مب عشان جيه تدخل السجن..كان الموضوع يمكن ان ينحل بين المديرة و أهل البنت بس لان المديرة مواطنة وعندها واسطة و البنت وافدة انتشر الموضوع في الجرايد من اليوم الثاني ،و تبهدل اهل البنت في المحاكم. عيل وين كانت المحكمة يوم كنا نسمع ان الطالبة أو مدرسة مواطنة دخلت غرفة المديرة أو الاخصائية و ضربتها. من أصلا تستوي مثل هاي المواضيع و تكون المواطنة جزء من الموضوع اتشوف الموضوع فجأة انحل و ما يوصل للشرطة؟؟؟ليش ؟؟ شو الفرق بين الطالبة المواطنة و الطالبة الوافدة في التعليم ؟؟؟شوفوا الموضوع من هاي الناحية ، كطالبات هل المفروض يتعاملون وياهم جي؟؟!!و بحكم واحد يدمرون مستقبلهم جيه!!!
بغض النظر عن مواطنة أو وافدة.. حطوا عيالكم ولا خواتكم مكان البنت.. و حسوا في البنت.
اذا اختكم و لا بنتكم تدخل السجن والله لانها سبت المديرة او اي حد ثاني عيل شو بتسوي المحكمة اذا الطالبة ضربت و لا جتلت المديرة؟؟ شو بيشنقونها؟؟!!!
أنا اللي ما عيبني في الموضوع حكم المحكمة .. انا ادري ان الغلطة غلطة البنت وانها لازم تحترم قوانين المدرسة و تحترم المديرة.. بس ما كان لازم يدمرون مستقبلها جيه.. واااايد سمعنا ان طالبات في المدارس الحكومية ضربوا مدرساتهم و لا مديراتهم بس ماحكمت عليهم المجكمة جيه..
و اللي يقهر أكثر ان اول شي طلعوها بكفالة بس الحكم النهائي كان السجن لمدة شهر..و قالت المحكمة اذا وقعت المديرة و تنازلت ممكن يطلعونها بكفالة..بس في نفس اليوم اللي كانت لازم المديرة توقع عشان الكفالة .. أهل البنت كانوا حاضرين بس المديرة ما احضرت لانها كانت في أبوظبي.ليش ما تروم اتي دقيقتين توقع و تروح اذا كانت تهمها مصلحة البنت على الاقل..و المحكمة ما سوت شي..
ضيعوا مستقبلها ..و الموضوع مستوي قبل الامتحانات يعني أكيد ما امتحنت.. لان مستحيل يسمحون لطالبة تذاكر داخل السجن و اللجنة اتيها السجن و تمتحنها صح ؟؟!!
الله يعين أهلها.. انا ما ادري شوي سووا اهلها..أكيد ما بيسكتون و بيحاولون يسوون شي. بس ما أعرف يمكن تكون امكانياتهم محدودة. وما عندهم حد يساعدهم..أتمنى حد يساعدهم.. انا بس سمعت الخبر من مصادر موثوقة من المدرسة اللي فيها البنت و المحكمة و حبيت أتكلم في المنتدى..
محد يفهمني غلط أنا ما احمل المديرة و الوكيله الغلط، انا ادري البنت غلطانة، بس كان الموضوع ممكن ينحل بطريقه و ديه أو بس بالغرامة..اذا يبغون يأدبون البنت..
الحكم خلاص تطبق و البنت في السجن وأنا أدري اني متأخره في طرح الموضوع بس لاني بس أمس دريت عن الحكم النهائي..ولأن فيني قهر كتبت في المنتدى..
والله حررام عليهم..حتى الاحكام صارت تعطى بواسطة..
خلاص عيل انا بسرق بنك باجر ..ولان اكيد عندي واسطه بيطلعوني بكفالة..
مــنــقــول
انا صراااحة استغربت كتير من هالخبر الله يعين 
الثلاثاء أبريل 01, 2008 1:25 pm
